28–29 красавіка ў Нацыянальнай бібліятэцы Беларусі праходзілі XVІІ Міжнародныя кнігазнаўчыя чытанні, прысвечаныя 100-гадовай гісторыі фарміравання фонду.

За два дні на пленарным і рабочых пасяджэннях прагучала больш за 50 дакладаў ад навукоўцаў з Беларусі і Расіі. Анлайн-трансляцыя канферэнцыі дазволіла завочна папрысутнічаць у якасці гасцей усім жадаючым з розных краін. 

Ад імя першага намесніка міністра культуры Рэспублікі Беларусь Валерыя Грамады і генеральнага дырэктара Нацыянальнай бібліятэкі Беларусі Аксаны Кніжнікавай удзельнікаў мерапрыемства павітаў дырэктар па інфармацыйных рэсурсах і абслугоўванні карыстальнікаў Віктар Пшыбытка, у аддаленым фармаце – генеральны дырэктар Расійскай дзяржаўнай бібліятэкі Вадзім Дуда.

На пленарным пасяджэнні прагучалі даклады рэктара Мінскай духоўнай акадэміі архімандрыта Афанасія (Сакалова), загадчыцы навукова-даследчага аддзела рэдкіх кніг Расійскай дзяржаўнай бібліятэкі Джамілі Рамазанавай, вядучага навуковага супрацоўніка Інстытута славяназнаўства Расійскай акадэміі навук Юрыя Лабынцава і старшага навуковага супрацоўніка Ларысы Шчавінскай, галоўнага бібліёграфа навукова-даследчага аддзела кнігазнаўства Нацыянальнай бібліятэкі Беларусі Галіны Кірэевай. 

Кірылічныя выданні, рукапісы Веткаўскага музея стараверства і беларускіх традыцый імя Ф.Р. Шклярава, знакамітыя дзеячы навукі і культуры Беларусі – далёка не поўны пералік цікавых і актуальных тэм, паднятых на мерапрыемстве. Кола пытанняў, якія абмяркоўваліся на канферэнцыі, ахапіла важныя аспекты развіцця кніжнай культуры – ад рукапісаў да выкарыстання сучасных інфармацыйных тэхналогій на ўсіх этапах функцыянавання кнігі.

Міжнародныя кнігазнаўчыя чытанні праходзяць штогод і аб'ядноўваюць спецыялістаў і навукоўцаў з розных краін, з'яўляючыся добрай пляцоўкай для абмеркавання праблем захавання, вывучэння і перадачы будучым пакаленням кніжнай спадчыны і культуры.⁠

Праграма XVІІI МКЧ

Відэазапіс канферэнцыі:
https://youtu.be/Xg_HMpbeeYs (1-шы дзень)
https://youtu.be/BF3kQocbQMM (2-гі дзень)

Матэрыял пададзены навукова-даследчым аддзелам кнігазнаўства.